Sleikmeistarar

Sigga Dögg kynfræðingur segir frá því í grein í Fréttablaðinu í dag að á meðan hún vann í fjármálatæki fyrir Hrun hafi skrifstofupartí verið öflugur vettvangur undirmanna til að fara "í sleik" við yfirmenn. Eða öfugt.

Mér þykir þetta ekki mikið. Ég þekki ólygna unga konu sem var við eftirlit á grunnskólaballi á dögunum. Þar var mikið farið í sleik, segir hún mér, enda þetta árlega ball kallað sleikballið.

Viltu fara í sleik við vin minn? var kannski spurt. Ókei. Og svo smullu þau saman í sleik og fóru síðan hvort í sína áttina.

Mér er sagt að á þessu sama balli fyrir ári síðan hafi verið sett met: einn nemandi fór í 54 sleika á sama ballinu. Hann á væntanlega glæsta framtíð í fjármálageiranum. 

Athugasemdir

[Ómar Ragnarsson, 16.3.2012 kl. 20:20]

Ekkert nýtt undir sólinni. Þegar bræður mínir voru í skólanum að Núpi í Dýrafirði fyrir 55 árum var "sleikurinn" á allra vörum í bókstaflegri merkingu.

Þetta orð var hins vegar aldrei nefnt í framhaldsskólunum í Reykjavík sem ég var í, en fyrirbærið hefur áreiðanlega verið til fyrir því.

[Ómar Valdimarsson, 18.3.2012 kl. 00:56]

Þetta hefur mig grunað lengi - að þetta fyrirbæri hafi borist til Reykjavíkur utan af landi!