Kópavogur á betra skilið

Ég var í mörg ár í PR bransanum og vann margháttuð verkefni fyrir félög, fyrirtæki og stofnanir. Þar á meðal bæjarfélög og ríkisvaldið.

Aldrei hefði mér, eða félögum mínum í þeim bransa, liðist að rukka og rukka en skila ekki verkinu, eins og nú virðist mega í mínum heimabæ, Kópavogi. En við vorum heldur ekki synir og dætur bæjarstjórans.

Bæjarstjórinn hér, Gunnar Birgisson, hafði einfaldlega rangt fyrir sér þegar hann sagði í Kastljósinu í kvöld að dóttir sín ætti ekki að gjalda faðernis síns. Bæjarstjóri, sem vill vera vandur að virðingu sinni og bera virðingu fyrir bæjarbúunum sem leggja honum til peninga til að reka bæinn, á einfaldlega að vera hafinn yfir allan grun um spillingu.

Sá grunur er augljóslega fyrir hendi þegar eldhússfyrirtæki dóttur hans fær borgaða reikninga upp á rúmar 50 milljónir á áratug - og þarf ekki að skila verkum á móti. 

Kópavogsbær á betra skilið.

 

Athugasemdir

[Jens Guð, 20.5.2009 kl. 02:31]

  Ég var í PR bransanum í hálfan annan áratug.  Það er mér nýr flötur á þessari vinnu að rukkað sé fyrir verkefni sem aldrei voru afgreidd á lokastigi.  Upphæðirnar sem þarna um ræðir eru sömuleiðis risavaxnar miðað við það sem ég þekki til.  Ég staldra sérstaklega við heiðusskjöl.  Þar er ég á heimavelli.  Þarna eru í umferð upphæðir sem passa ekki við neitt sem ég kannast við.     

[Kjartan Pétur Sigurðsson, 20.5.2009 kl. 07:32]

Ég hef á tilfinningunni að það leynist víða pottur brotinn hjá Gunnari Birgissyni bæjarstjóra. Legg til að önnur sambærileg mál hjá bæjarstjóranum verði könnuð með svipuðum hætti.

[Hólmfríður Bjarnadóttir, 21.5.2009 kl. 22:32]

Katrín Jakobs er búin að fela stjórn LÍN að skoða reikninga frá dóttirinn á þeim bæ.