Bla bla-ble ble í Kópavogi

Ef það væri ekki komið vor og veðrið gott þá væri hin daglega óhamingja endalaus.

Forustumenn bæjarstjórnarframboðanna í Kópavogi voru í sjónvarpinu í kvöld, spurðir um mikilvægustu málin fyrir kosningarnar. Og það var þetta venjulega, byggingar, skólar, 'atvinnumálin'...bla bla bla, ble ble ble. 

Eftir kjörtímabil þegar bæjarstjórinn varð að taka pokann sinn vegna spillingar og hálf bæjarstjórnin er á leið fyrir sakadómara vegna fjármálasukks, þá er það þetta sem frambjóðendurnir halda að skipti mestu máli. 

Enginn þeirra nefndi heilindi, siðferði, heilbrigt stjórnkerfi, afnám einkavinavæðingarinnar og spillingarinnar - þetta sem svo sárlega vantar í opinbert líf, ekki síst stjórnmálalífið í Kópavogi. Jú, annars, efsti maður á lista VG sagði "heiðarleiki" í framhjáhlaupi.

Ekki einu sinni Næstbesti flokkurinn gat híft þetta upp á annað plan. 

Eins gott að vorið er komið.

Athugasemdir

[Sigurður Haukur Gíslason, 19.5.2010 kl. 22:50]

Það sem mér fannst sorglegt hve þessum kosningum eru gerð lítil skil í ríkisfjölmiðlinum RUV. Tíu mínútna umfjöllun þar sem hver frambjóðandi talaði í 30 sekúntur er harla lítið þegar um er að ræða næst stærsta sveitarfélag landsins.

Þess vegna segi ég bla bla-ble ble, RUV hvað?

[Óttar Felix Hauksson (IP-tala skráð) 20.5.2010 kl. 00:53]

"...og hálf bæjarstjórnin er á leið til sakadómara vegna fjármálasukks..." Þetta er athyglisverð fullyrðing Ómar. Þetta þýðir að 5- 6 af núverandi bæjarfulltrúm séu "... á leið til sakadómara". Hvaða brot eru gefin að sök? Varla er verknaðarlýsingin í ákærunni "fjármálasukk",  einhver ákveðin brot hljóta að vera tilgreind. Það væri gaman ef þú gætir varpað skýrari ljósi á þessa fullyrðingu ( eða er þetta kannski bara bla, bla, bla, ble, ble, ble?)

[Ómar Valdimarsson, 20.5.2010 kl. 10:26]

Formaður Sjálfstæðisfélagsins í Kópavogi, Óttar Felix, veit vitaskuld að enn hefur engin ákæra verið gefin út í þessu máli. Öll stjórn lífeyrissjóðs starfsmanna bæjarins var sett af þegar í ljós kom að hún hafði ávaxtað fjármuni sjóðsins í bæjarsjóði. Allt þetta fólk (2 Sjálfstæðismenn, 1 Framsóknarmaður, 1 VG og 1 Sf) er grunað um refsiverðan verkað í þessu sambandi og hefur réttarfarslega stöðu sem slíkt. Hvernig sem málið fer hlýtur þessi staða að kalla á umtalsverðar siðbætur í stjórn bæjarins.

[Óttar Felix Hauksson, 20.5.2010 kl. 16:16]

Nú er einhverju að slá saman. En hafa skal það sem reynist. Ef þú ert að ræða um "lífeyrissjóðsmálið" svokallaða, þá er það ekki fyrir sakadómi og þar með er "hálf bæjarstjórnin", eins og þú kýst að orða það, ekki á leiðinni til skakadómara. Hið rétta er að fjármálaráðherra skrifaði fjármálaeftirlitinu bréf snemmsumars 2009 vegna þessa máls og fór fram á rannsókn. Í kjölfarið, sem kunnugt er, vék þáverandi bæjarstjóri úr starfi meðan á rannsókn málsins stóð. Málið er enn hjá fjármálaeftirlitinu. Ekki veit ég hvort ónákvæmnin í atvikalýsingu þinni sé vísvitandi eða hvort þér hafi förlast svona í rannsóknarblaðamennskunni en áfram heldur ruglið:  "Öll stjórn lífeyrissjóðs starfsmannabæjarins var sett af þegar í ljós kom að hún hafði ávaxtað fjármuni sjóðsins í bæjarsjóði". Ómar það var ekki ámælisvert, að mati fjármálaeftirlitsins, að ávaxta féð hjá bæjarsjóði (enda öllu öruggari kostur en bankarnir sem á þeim voru að hrynja), heldur það að stjórn lífeyrissjóðsins hafði farið hálfu öðru prósentustigi framyfir við kaup á skuldabréfum bæjarsjóðs miðað við reglur um ráðstöfunarhlutfall af eigin fé. Að lokum er rétt að geta þess að formaður Sjálfstæðisfélagsins í Kópavogi heitir Hákon Róbert Jónsson, ég hef ekki gegnt þar formennsku. Vanda sig Ómar! Það er nóg af bla,bla, ble,ble fólki á netinu. Þú ert fréttamaður.

[Óttar Felix Hauksson, 20.5.2010 kl. 16:30]

Leiðrétting:

...(enda öllu öruggari kostur en bankarnir, sem á þeim tíma voru að hrynja).