Skötuselur í mango-chutneysósu

Maður borðar aldrei nóg af skötusel. Þótt hann sé ekki smáfríður er hann dýrlegur til átu, ekki síst núna þegar hann er orðinn raunveruleg sameign þjóðarinnar. Hér er uppskrift sem ég hef svolítið notað og alltaf gefist vel. Mestu skiptir að ofelda hann ekki, þá verður hann seigur.

700 g skötuselur

250 g rækjur

3 msk. karrímauk

3 msk. mangó-chutney

2 msk. kóríander

1 stk. stór hvítlauksgeiri

grænmetiskraftur

¼ lítri rjómi

4 msk. olía

salt

nýmalaður pipar

• Hreinsið skötuselinn og skerið í jafna bita.
• Hrærið saman karrímauki og mangó-chutney og saxið kóríander út í maukið
• Afhýðið hvítlauk, pressið og bætið út í maukið ásamt grænmetiskrafti og rjóma
• Hitið olíu á pönnu.
• Steikið skötuselinn í um 1 mín. á hvorri hlið á vel heitri pönnunni.
• Kryddið með salti og pipar en athugið að það þarf lítið salt vegna saltinnihalds grænmetiskraftsins.
• Raðið skötuselnum í smurt eldfast mót og setjið maukið yfir.
• Bakið í 10 mín. við 200°C.
• Takið fatið út eftir 8 mín. og stráið rækjunum yfir.
• Setjið fatið inn í ofn í 2 mín. til viðbótar.

 

Athugasemdir

[Hólmfríður Bjarnadóttir, 24.3.2010 kl. 00:37]

Nú getum við sungið "Fiskinn minn, nammi nammi namm" um blessaðan skötuselinn. Uppskriftin hljómar vel og vatnið í munninum er byrjað að aukast. Þetta mál er bara fyrsta skrefið af mörgum til að endurheimta okkar sameiginlegu auðlind.Það er líka mikill stígandi í umræunni í samfélaginu. Og Vilhjálmur Egilsson sló ramm skakka keilu með sínu innleggi.

[Ía Jóhannsdóttir, 24.3.2010 kl. 18:28]

Þetta minnir mig á uppskrift frá Tailenskri vinkonu minni sem býr í Frisco og hálft árið í Tailandi.  H'un eldar þvílíkt góðan mat.  Jammí.......... góða helgi og páska ef ég nenni ekki að senda ykkur línur fyrr elskulega hjón og nágrannar.