Nátttröllin

Það var í rauninni svolítið óhugnanlegt að horfa á ágæta mynd um forsetakjör Vigdísar Finnbogadóttur í sjónvarpinu í gærkvöld.

Það óhugnanlega var hversu áberandi kvenfyrirlitningin var í opinberri umræðu á þessum tíma – sumir keppinauta hennar í kosningunum voru eins og nátttröll sem fannst augljóslega gjörsamlega út í hött að konukind væri að abbast þetta upp á dekk - fyrir nú utan ýmislegt það sem sagt var (og sagt er enn).

Það var líka óhugnanlegt að hugsa til þess hversu langt er í land í jafnréttismálum hér, þótt mikið hafi áunnist á ekki lengri tíma en þetta. Og eru þó íslenskar konur miklu betur staddar en flestar aðrar konur í veröldinni.

Ég passaði mig náttúrlega á að láta ekki sjá mig á útifundinum, minnugur þess að kona ein í mannþrönginni á Lækjartorgi sagði við mig á Kvennafrídaginn 1975: Æ, ættir þú ekki bara að vera heima.

Ég veit hins vegar ekki alveg hvað mér finnst um stórt skilti sem ung kona bar hátt á lofti með áletruninni Píka. Ég skil ekki alveg hvað hún er að fara (sjá hér: http://www.mbl.is/mm/frettir/innlent/2010/10/25/um_50_000_i_midborginni/)

Hitt þykist ég vita, að ef karl sæist í næstu 1. maí göngu sveiflandi skilti með áletruninni Tittlingur, þá yrði allt vitlaust.

Athugasemdir

[Flosi Kristjánsson, 25.10.2010 kl. 22:24]

Tek undir það, að þrjátíu ára gömul birtingarmynd þess samfélags og þess tíðaranda sem var við lýði 1980 var sláandi. Mér fannst hreinn dónaskapur að vera að þýfga Vigdísi um hjúskaparstatus og skerta möguleika hennar til að gegna starfi vegna þess að hún væri einhleyp. En svona var þetta fyrir þrjátíu árum.

Hitt þótti mér líka alveg drepfyndið þegar Vigdís lýsti því yfir að kona gæti ekki orðið sé úti um húsfreyju, eins og menn orðuðu það á þessum árum. Það mátti skilja á henni að slíkt væri bara alls ekki inni í myndinni og trúlega hafa herramennirnir verið henni innilega sammála. Svo kom Jóhanna ...

[Óskar Þorkelsson, 26.10.2010 kl. 09:19]

Þetta með píku skiltið er frekar grátbroslegt.. við vitum alveg að konur hafa píku :)