Tímasetning lekans

Enn eitt dæmið um hvernig mál rata í fréttir vegna þess að einhver hefur af þeim greinilega hagsmuni: frásögn DV af skuldamálum Ástráðs Haraldssonar lögmanns í Glitni.

Dettur einhverjum í hug að tímasetningin á þessum leka hafi verið tilviljun? Að hann hafi ekki verið hugsaður sem innlegg í umræðuna um yfirvofandi brottrekstur forstjóra FME?

Enn meiri ástæða fyrir almenning að reyna að átta sig á hvers vegna tilteknar fréttir birtast á tilteknum tíma.

Hagsmunirnir sem verið er að verja hér eru ekki hagsmunir almennings. Hér er í gangi eitthvert spil sem venjulegt fólk kann ekki skil á og er ekki ætlað að skilja.

Athugasemdir

[Flosi Kristjánsson, 21.2.2012 kl. 18:58]

Í þá gömlu, góðu daga þegar sérhver stjórnmálaflokkur átti sitt málgagn, þá vandist maður þessum vinnubrögðum. Að vísu var ekki grafið mjög djúpt eftir skít, en framreiðslan á fréttunum gat farið út í ótrúlegustu hluti.

Man eftir því að hafa (sem prófarkalesari í Blaðaprenti) breytt texta sem átti að fara inn í Tímann árið 1979, þar sem sagði að Bísleifur og Siggi sæti hefðu verið að kynna stefnuskrá Sjálfstæðisflokksins í Valhöll. Fréttin fór á forsíðu, örlítið snyrt!

Hagsmunir mismunandi aðila í samfélaginu ráða því hvað er fjallað um og hvernig.  Staðasetning frétta í blaði segja líka til um hve mikla áherslu útgefendur og ritstjórn leggja á fréttina.

Þó þetta gagnkvæma skítkast, sem er að verða þjóðaríþrótt, sé farið að verða ansi leiðigjarnt, þá þótti mér drepfyndið að Ástráður lögmaður hefði verið á fullu í braski á sínum tíma og fengið lán hjá Glitni til að kaupa hlutafé í Kaupþingi! Miðað við þann bakgrunn sem maðurinn hefur og meintar pólitískar tengingar, þá taldi maður að hann væri tandurhreinn.

Það gæti farið að skolast glansinn af Vinstri-grænum, sem hafa haft það orð á sér að þeir hafi hvergi komið nærri dansinum um gullkálfinn á fyrsta áratug þessarar aldar.