Kiljubítl

Það var ekki fyrr en seinna sem ég lærði að meta Stones almennilega en Bítlarnir voru og eru mínir menn. Og eins margir aðrir af minni kynslóð get ég raulað með í flestum Bítlalögum. 

Kiljan er líka minn þáttur.  Þar er yfirleitt fjallað af þekkingu og skilningi um efni sem ég hef áhuga á.

En það er stef Kiljunnar sem ég hef lengi verið að brjóta heilann um, þetta sem smekkmaðurinn Jón Bítlavinur Ólafsson er skráður fyrir. Mér hefur alltaf þótt þetta eitthvað kunnuglegt. 

Svo í kvöld þegar ég var að njóta míns daglega Bítlaskammts þá fattaði ég þetta allt í einu: Kiljustefið er náttúrlega ekki annað en upphafs gítarfrasinn úr Paperback Writer! Ég fann þetta meira að segja á YouTube - hlustið á þetta og hlustið svo á Kiljustefið.

Gott ef það er ekki þarna líka svolítil bassaflétta ættuð frá Paul McCartney - sama bassafléttan sem sannfærði margan bítilæringjann um að Paul væri sennilega bara nokkuð lunkinn bassaleikari.

Ergo: Ætti ekki að skrifa Lennon & McCartney fyrir Kiljustefinu?

Athugasemdir

[Júlíus Valsson, 18.3.2010 kl. 02:24]

Þeir hengdu Jón en séra Jón gengur enn laus sbr:

http://juliusvalsson.blog.is/blog/juliusvalsson/entry/501941/

[Dr. Gunni (IP-tala skráð) 18.3.2010 kl. 06:40]

Þetta er bara homage hjá Jóni. Hann hefur verið beðinn að semja stef í bókmenntaþátt og ergo, hugsað til Paperback writer. Mér finnst þetta sniðugt.

[Flosi Kristjánsson, 18.3.2010 kl. 13:38]

Þetta er alveg hárrétt tilgáta hjá þér, Ómar. Við sem kunnum Bítlalögin afturábak og áfram, og vitum "hvaða lag kemur næst" getum ekki klikkað á þessu.

Kiljan og Paperback Writer fellur svo saman eins og flís við rass, og orðaleikurinn með nafn Nóbelsskáldsins og bókar í kiljuformi er tær snilld (if you pardon my French!)

[Pétur Ástvaldsson (IP-tala skráð) 19.3.2010 kl. 11:17]

Já, þetta er smekklega gert hjá Jóni. Hann mætti síðan alveg taka að sér að semja nýtt kynningarlag fyrir Silfur Egils. Mér finnst það stef eitthvert drepleiðinlegasta kynningarstef seinni tíma, hér á landi á - sannkallaður fleinn í eyra.

[Ómar Valdimarsson, 19.3.2010 kl. 22:08]

Það var kannski eins gott gott að það var Jón 'góði' Ólafsson en ekki einhver annar sem þarna átti hlut að máli. Jón er vel liðinn og vinsæll, eins og sjá má af ummælum hér að ofan. En hvað hefðu menn sagt ef Þráinn Bertelsson hefði "samið" Kiljustefið?